Prins Ramon I, adjudante Jouke en Lars
Höf dien glaas nog maar eine kier in de lóch,Want met ôs lig geej nog lang naet in d’n bóch.
Volg ’t dreejspan via:
Prins Ramon I
Gruuëts bin ik um as 54e hoëgheid van Vastelaoves Gezelschap de Vogelhut, same mit mien Adjudante Jouke en Lars, de Vastelaovend veur te meuge gaon en ôg mien laevesverhaol meug vertelle.
Miene naam is Ramon de Brouwer, 28 jaor ald, gebaore en getaoge in Venlo. Al ruum zes en ein half jaor bin ik same mit mien maedje Rachelle. Sinds ein diek jaor woeëne weej same en meuge weej in mei ôs (veur noow nog) iërste möpke verwachte. Op dit moment bin ik werkzaam in de Douanewaereld beej ’t bedrief Gaston Schul. Nao twieë jaor aktief te zien gewaes as Declarant, bin ik in de zomer van 2024 euvergestap nao ein ander team binne dit vakgebied um mien kinnis oét te breide. Binne mien huidig team halde weej ôs veurnamelik bezig mit Accijns en invoer-btw beej zendinge binne Europa, mit de focus op Nederland. Zoë verzörge weej diverse aangifte beej de Douane en de Belastingdeens en voere weej daornaeve de benuuëdigde (bookhaldkundige) kontrôles oét op aafstand.
Meziék speult al van jônks aaf aan eine groëte rol in mien laeve. Ik begôs mit blokfluitlesse en vervolgde mien muzikale ôntwikkeling mit trômmellesse in De Maagdenberg, onder de vleugels van de Hermenie van Venlo. In 2009 bin ik euvergestap naor Meziékvereiniging Valuas, waor mien passie veur slaagwerk éch tot bleuj kwaam. Daor makde ik kinnis mit oéteinlaupende instrumente zoëas djembés, bongo’s, pauke en de xylofoon. Inmiddels staon d’r miërdere drumstelle beej mich thoés en heb ik door de jaore haer al hiël wat velle en drumstokke verslete.
De Vastelaovend is mich mit de paplaepel ingegaote. Ôndanks ein wat aarzelend begin – zoë vônd ik de steek van miene pap, adjudant in 1999 beej VG de Vogelhut, as twië jäörige behuuërlik indrökwekkend – greujde mien leefde veur ‘t fees rap. In groep 7 en 8 waas ik al lid van de Raod van de Jeug beej De Wien. In 2013 sloot ik mich aan beej Jocus Toekôms en noom plaats in de Raod van 11. Binne dees vereiniging heb ik diverse funkties meuge vervölle, mit as hoëgtepunt mien rol as Vors Joeccius Juniores XI.
regalia regele veur ’t dreejspan en andere belangriéke funkties – nog neet weitende det ik ‘n paar maond later zelf de regalia van VG de Vogelhut moch gaon draage.
Mien Adjudante heb ik liére kinne op ’t Valuascollege. In 2012 kwaame weej same in de klas in ’t twiëde liérjaor HAVO, waor weej Twiëtalig Ônderwiés (TTO) Duits volgde. Vanaaf toen deile weej ein ônônderbraoke vrindschap van inmiddels ruum dertiën jaor. Auk toen weej in 4 HAVO oét mekaar ginge door ’t stoppe van de TTO en ’t keeze van verschillende vakkepakkette, bleve weej ôs waekelijks zeen. Det resulteerde ônder andere in jaorlikse vakanties, die steeds groëter, moeier en oétintelik ouk deurder woorte.
Door de jaore haer hebbe weej same al hiël wat meigemak: van zoépvakanties naor Spanje wies de Ramadan in Marokko, en van zônvakanties in Kroatië wies ‘n roadtrip in Amerika en netuuërlik lange aovende in Venlo, waobeej weej òngetwiéfeld hebbe beejgedrage aan de slietage van minnig beerleiding. Ôndanks ôs verschillende studies én interesses zien weej altiéd kôntak bliéve halde. Det haet gezörg veur de ôntelbare anekdotes en wietse die weej nao al die jaore nog altiéd herhaole – van lichte wanhaop beej ôs maedjes, maar wies groët plezeer van ôszelluf
Ik bin ôntzettend gruuëts det ik dit avontuur mit Jouke en Lars meug belaeve. Vastelaovend is immers ein fees van verbinding en samezién, ônder ’t genot van ein lekker glaeske Spa Gold… of waas ‘t toch ein döpke Jäger? Wie dan auk: ik wins idderein eine waan Vastelaovend, same mit vrinde en femilie.
Weej zeen ôs flots (laes: vlot).
Vastelaovend same!
Adjudant Lars
Miene naam is Lars, gebaore op 28 mei 1999, greujde op in ‘t Greunveld in Venlo. Door de jaore haer kwame vuuël hobby’s aan bod. Van voetballe beej de Venlosche boys naor oétgaon in de kroeg, wies ik oétintelik oétkwaam beej mien letste nieje hobby: reize.
‘t Begin heejvan leet al miër dan 10 jaor truuk.
Naodet weej ôs hadde liëre kinne in de 2e klas van ‘t Valuascollege waas ‘t metein dieke mik. Dit begôs in de pauzes, en netuuërlik ouk tiédes de lesse, vuuël aldehore euver van alles en nog wat. Later zoote we zoë good as waekeliks same um in ‘t weekend de meis oéteinloupende dinge te doon. ‘t Eine weekend zoote we beej ‘t voetballe in Mönchengladbach, ‘t weekend d’r op stônde we mit zien alle in de stad en gank zoë maar door. Dit ôntwikkelde zich door de joare steeds miër zoëdet we zelfs mit zien alle op vakantie ginge. Ik weit nog good, de iërste kiër mit zien alle op paad. Wat hebbe weej ein lol en plezeer gehad en wat hebbe weej moeje plekke bezôch. Daordoor weit ik zeker, heej is mien leefde veur op reis gaon ôntstaon.
Iets miër dan ‘n jaor geleeje kwaam ik mien groëte leefde Jitte taege. Wat hebben weej in dae korte tiéd toch al vuuël meigemak en ik haop det d’r nog vuuël jaore, gevöld mit leuke herinneringe, meuge volge.
Kort samegevat: Lars, altiéd drök op paad en ônderwaeg. Is ‘t neet veur mien groëte leefde dan is ‘t waal veur de vrinde, de vakantie en soms ouk nog ‘t werk. Geneete doon ik in idder geval van alle leuke minse um mich haer.
Vastelaovend same!
Adjudant Jouke,
Miene naam is Jouke Braun, gebaore op 8 september 1998 en daormeij dus 27 jaor ald. Ik bin gebaore in Venlo maar mien ganse jeug heb ik ‘oppe Ruiver’ gewoënd.
Inmiddels bin ik al zô’n dreej en ein half jaor same mit mien maedje Grace. Van die dreej en ein half jaor woëne weej inmiddels al anderhalf jaor same aan de andere kant van mooder Maas op de Tiendstraot in Bliërick.
Mien basisschoëltiéd speulde zich aaf op basisschoël de Meander ‘oppe Ruiver’. Waobeej ik boéte schoël vuuël van miene tiëd doorbrach mit drumme en voetballe beej VV Reuver. Deze hobby’s woorte later ingeruild veur wielrenne en veldrieje. Nao groep 8 heb ik de keuze gemak veur ‘t Valuascollege. Idere daag mit de fiets op en neer door waer en wind. Maar det waas ‘t natuuërlijk allemaol waerd. Want in de 2e klas van ‘t Valuas liërde ik Ramon en Lars kinne. Weej hadde allemaol gekaoze veur TTO Duits en daorum kwame weej beejein in de klas. Same mit ôzze kammeraod Arjen, dae auk beej ôs in de klas zoot, hebbe weej inmiddels al vuuël belaef. Van ein zoépvakantie in Spanje wies ein roadtrip door zuidwest Amerika. En van ein roadtrip door Marokko, wies ein waek naor de formule 1, groëte priés van Oësteriék. Daorbeej hebbe weej nog ein aantal activiteite waor weej gaer ôzze tiéd aan bestaeje, zoëas op zaoterdaag naor ‘t voetballe in Mönchengladbach gaon en wies in de vruuge eurkes op stap gaon in de stad.
Nao ‘t Valuas heb ik gekaoze veur de opleiding HBO Sportkunde, waornao ik mien iérste “”groëte minse baan” tósse de kleine kinder begôs. Ein kômbinatiefunktie van Sport-Pedagogisch medewerker op ein sport BSO en gymliéraar op ein basisschoél. Dit waas aevel neet iets waat ik mien ganse laeve woel bliéve doon.
Zô’n dieke twië en ein half jaor geleeje bin ik begôs as transportplanner beej ECS in Venlo. Ein Belgisch transportbedriéf det door gans Europa containers vol met goedere verveurt.
In miene vreeje tiéd vind ik ‘t leuk um te sporte mit vrinde. Heejbeej kinse ônder andere dinke aan padelle en ein aantal kiér in de waek aan de schiéve hange beej Basic-fit. Daorbeej vind ik ‘t leuk um op ein terras te zitte en ein pilske te drinke in ein van de kroege die Venlo riék is. Taevens heb ik dit jaor al veur ‘t achtiënde seizoen op riej ein seizoenskaart beej VVV same mit miene pap.
Heejbeej wins ik ôg allemaol eine schoëne vastelaovend en ik kiék d’r naor oét um same met Ramon en Lars van de kômmende vastelaovend de moëiste vastelaovend oëit te make.
Vastelaovend same!
