Prins Sonny I
Gruuëts meug ik ôg mien leavesverhaol vertelle as 53e hoëgheid van dit fantastische gezelschap VG. De vogelhut. Toen ik in 1990 in Tegelen oppe hei veur ut iërs ut laevesleech zoog had ik noëits meuge druime det ik 34 jaor later dit fantastisch gezelschap veur meug gaon mit mien twië geweldige adjudante maar baovenal vrinde.
Liërde telle en schriéve op de kleiberg in Tegelen. Um vervolges mien iërste metaal-spaone te make op den Hulster in Tegelen. Um oétintelik via ein aantal tössestations terech te kômme as verkauper beej MGG in Tegelen.
In mien jeug heb ik gevoetbald en wat gepingeld op de gitaar. Maar auk waas ik regelmaotig in de kroeg te vinde.
In 2012 tiédes de veurbereidinge van ut seizoen 2013 bin ik gaon vreeje mit de leefde van mien laeve Jill , waor ik inmiddels mei getrouwd bin. Same hebbe weej eine spetter van ein dochter, Feline.
Jacky heb ik liëre kinne op eine surpriseaovend beej ald Prins Marco en zien vriendin Eef thoés mit Sinterklaos. Nao deze aovend hebbe we minnig pilske same gedrônke. Nicko en zien vruike hebbe we liëre kinne tiédes ‘t oétgaon, maar einmaol same op vakantie te zien gewaes zien we pas éch gooje vrinde gewaore.
Nao minnig feesje, voetbalwedstriéd, festival, bbq, wiekendjes weg, en nog vuuël miër um op te neume, bin ik gruuëts det dees twië matties same mit eur vruikes dit avontuur mit ôs aangaon. En meug ik mich gelökkig priéze det ik dit avontuur neet mit 2 maar mit 3 van mien beste vrinde meug meimake.
Geneet, veurdesse ‘t wets is ‘t veurbeej.
Vastelaovend same.
Prins Sonny I (van Dijk)
Adjudant Nicko
‘t Waas 1984 toen Henk en Jose taegenein zagte “zulle we ens gek doon en ein apart menke make” en tadaa…, heej isse dan, kleine Nicko.
Gebaore in 1985 en geliék drök. Nicko waas ein leef, apart jungske. Hae had de pamper nog um en ging al lekker mei naor de kroeg mit zien elders. Hae ging dan midde veur de deur zitte mit zien autokes speule, zoëdet neemus miër normaal binne kôs. En asse klaor waas, stampte hae ze kepot en zag, “zoë, die maak ik thoés in de garage”.
Ein paar jaor later ging hae op steyl naor de “basissjoël”, waor hae zich al snel vervaelde en alles op stelte zat. Zien elders wiste al metein, “det wuuërt d’r genne veur op kantoër”.
Det alles gehad ging hae naor de Mavo in Venlo, maar det deurde maar eín jaor, want inderdaad, hae meus lekker met zien “heng” werke en ging naor Tegele naor de VBO bouw, waor hae auk hiël mekkelijk zien diploma haolde en op pepeer, net as ziene pap, timmerman waas.
Tóch waas ‘t det auk neet en hae ging in 2006 de staalbouw in. Lekker 4 of 5 oor reize per daag en auk nog ens 40 oor werke in de waek. Det haet hae 18 jaor volgehalde.
Hae werk noow lekker 10 minute van hoés aaf as technische man in ein hotel, want det is toch éch wal baeter noow dette in 2022 intelik zélf pappie woort van ziene alles, Rio.
25 jaor geleeje kwaam jacky in zien leave. Zeej hebbe efkes beejein in de klas gezaete maar vaerder waas d’r niks spesjaals. Aevel 5 jaor later kwame ze mekaar weer teage, vanaaf det moment hebbe ze hiël vuuël leuke en gekke herinneringe gemak en woorte zeej dieke matties.
In 2008 liërde Panicko, Corina kinne, de leefde van zien leave.
Al snel ginge zeej same woëne in Venlo en in 2013 liërde zeej Sonny en Jill kinne, ôzze Hoëgheid mit zien Prinseske. ‘t Kôntak waas nog hiël vers maar zeej kwame detzelfde jaor nog op eur broélof.
Vanaaf det moment woorte auk zeej dieke vrinde en wies op d’n daag van vandaag hebbe zeej eine super goojje vrindegroep en zien zeej matties 4 life.
Nao hiël vuuël leuke, vette momente, zien zeej nog aeve dieke vrinde. Leeve Saskia is aan kômme weije en zeej hebbe allemaol schatte van kinder, dus al mit al, ‘t perfekte plaetje.
Nicko Huijgen
Adjudant Jacky
Jacky, gebaore op 16 jannewari 1986, greujde op in keffee “Up Quelle” in Tegele, waor hae zien passie veur darte ôntdekte. ‘t Keffee waas de plaats wao hae vuuël tiéd doorbrach, zoëwaal um te speule as um vrindschappe te smeeje.
Daor kwaam hae Nicko en Sonny taege, same belaefde zeej de nuuëdige avonture. Van BBQ’s tot VVV-wedstrijde, houseparty’s en vastelaovend. Same herinneringe make die dich veur altiéd beej bliéve.
De vrindschap dae ze in de laup van tiéd hebbe opgebouwd is nog altiéd sterk, ze bliéve mekaar steune, lache en plezeer make. Darte bleef aevel altiéd Jacky’s groëte hobby, ein sport waorin hae zich bleef ontwikkele en die um nog dök beejeinbrach mit vrinde veur ein gezellige kômpetitie.
Op zien 27ste woort Jacky vader van zien dochter Keylia, wat zien laeve ein niejje dimensie goof. Tóch bleef de band mit zien vrinde ônveranderd sterk. Veer jaor geleeje, op ein houseparty in Ettenleur, kwaam Jacky Saskia taege. Wat begôs as ein spôntane ôntmoeting greuijde al snel oét tot ein groëte leefde.
Jacky’s laeve is ein dynamisch avontuur, gevöld mit vrindschap, leefde, en zien favoriete hobby darte. Hae blief geneete van ‘t laeve, altiéd umrink door de minse die hae ‘t meiste waardeert.
Jacky Driessen