Dreejspan 2024:

Prins Michèl, adjudanten Harrie en Richard

Volg ’t dreejspan via:

Facebook dreejspan 2024

Instagram dreejspan 2024

Prins Michèl II

Ik bin Michèl Vinck, gebaore in Venlo op 15-04-1972. Opgegreujd in ‘t Annakamp in Bliërick. Ik heb 2 blaage, mien dochter Ienneke is gebaore op 11-11-2002 en is dus mit ‘t vastelaovesvirus gebaore. Miene zoon Jeroen, gebaore op 7-9-2008, auk dae hilt van de vastelaovend. Vanoét mien jeugsport handbal kin ik mien twië adjudante. Weej hebbe jaore same ein belke gegoëjd en later auk vuuël aan de bar gehange. Ik bin dan auk gruuëts det de Vors van de Vogelhut mich vroog op miene 50ste verjäördaag of ik eur in 2024 veur woël gaon in de vastelaovend. Heej hoofde ik neet lang euver nao te dinke en heb volmôndig “Jao” gezag. Van hoés oét bin ik opgeleid as schilder op de vruugere ambachschoël in Venlo. Nao dit 25 jaor gedaon te hebbe kôs ik genne tex miër zeen en bin ik euvergestap naor mien huidige job as zelfstandige Kiësboer. Geej zult mich waorschienlik al hebbe zeen rieje in mien bus met die groëte moés d’r op. Weej gaon d’r same eine fijne tiéd van make. Vastelaovend Same…..

Adjudant Harrie

Miene naam is Harrie Tiggelers, gebaore in Bliërick op 11 April 1968, waor ik nog steeds gaer woën.
Ik heb 3 kinder te weite, Floor, Daan en Lars. Mien roots ligge in Bliërick, maar bin geregeld in Venlo te vinde umdet mien vriendin Ilse daor woënt met eur 2 kinder, Julie en Sofie.
Auk ík heb ’t vastelaovesvirus al as kind euvergenaome van mien elders. Ik handbal al vanaaf mien 7e laevesjaor beej HVB, taegewaordig train ik allein nog maar aaf en toe.
Ik kin de Prins en kollega-Adjudant al hiël wat jäörkes door deze geweldige sport en heb met deze 2 hiëre al hiël wat pilskes achtereuver geslage in minnig kantine.
Taegewaordig bin ik werkzaam beej NTS in Eindhoven as Projects inkouper, weej make o.a. machines veur chipfabrikant ASML. In miene vreeje tiéd doon ik ônder andere hardloupe, Squashe en handballe.
Vastelaovend bring ik taegwaordig miër in Venlo door, maar aevegood bliéf ik toch ’n bietje unne wortelepin, det veranderse neet miër. Ik heb d’r ôntzettend vuuël zin in en veul mich veriërd um deze vastelaovend mit dit dreejspan en mit dit geweldig gezelschap te meuge viëre.
We zeen ôs en vastelaovend same!

Adjudant Richard,

Ik bin Richard Gielen, gebaore op 6 April 1973 in Venlo aevel opgegreujd aan d’n euverkant van de Majjem.

Ik heb 3 kinder te weite, Daan (21), Stijn(19) en Rens(16) en woën op de hoëgeschoorwaeg.
Veur de leefde riej ik regelmaotig naor Venraoy.

Mien roots ligge op de Maasbreesestraot in Bliërick, wao ik as buurman van cafe Holla al vruug woord besmet mit ‘t vastelaovesvirus.
As blaag ging ik handballe beej HVB en dit is dan auk metein de euvereinkôms mit d’n hoëgheid Michèl en Adjudant Harrie.
Op mien 22ste bin ik naor de andere kant van de brök verhoés en noëits miër truuk gegaon.

Ik bin werkzaam as manager manufacturing engineering beej SPG-Prints in Boxmeer(‘t vruugere Stork).
In miene vreeje tiéd handbal ik nog steeds beej Groët Venlo, gaon ik geregeld mit mien vrinde ein pilske drinke en bin ik regelmaotig achter de bar te vinde as vreejwilliger beej Grenswerk.
Auk vind ik ‘t heerlijk um te kiéke wie mien koi`s groët waere in miene viéver.

De vastelaovend in Groët Venlo behuuërt nog altiéd tot ein van de fijnste daag van ‘t jaor.
Dit jaor bin ik hiël gruuëts det ik door hoëgheid Michel II gevraog bin um same in ‘t vogelriék veur te meuge gaon.

Vastelaovend Same…..