Dreejspan 2023:
Prins Theo II, en zien adjudante Michel en Peter!
Vastelaovend viere as eine vogel zoeë vreej,
Kin allein met ôs dreej der beej
Prins Theo II
Woeënend is dees prachtige stad Venlo, waor ik aan ‘t werk meug met mien firma TFA Services Schoorsteen en Dakbedekkingen.
Getrouwd met mien leeve vrouw Valentina, waomeij ik same twieë geweldige vastelaovend vierende dochters heb, geneump Inessa en Vanessa.
Hobby’s zien zoeëvuuel meugelik as ‘t geit op vekansie gaon. Favoriete lande zien Italië, Croatië en Rusland.
Al mier dan jaor en daag vrind van Jocus en auk van de Wakkermanne op den berg.
In mien vruuege jaore, prins beej de Judovereiniging op Steyl gewaes en zoot ik in de jeugraod van elf in den Haandert in Tegele.
In 2016 Adjudant beej prins Cay d’n ieërste en adjudant Ron.
Sinds 2017 Chef du Protocol beej dees fantastische vereiniging VG de Vogelhut en noow gruuëtse Hoeëgheid
Mienen 1e adjudant heb ik oeits ens gevraog beej t krense in de Maaspoort onder ’t genot van ein of twieë glaeskes beer.
Mienen 2e adjudant heb ik gevraog onder ’t genot van einen borrel of einen Barbecue, maar det is beej ôs um ’t aeve.
Beide zachte zonder twiefel of nao te dinke volmondig jao.
Same met mien twieë adjudante Michel en Peter gaon weej veurop in ‘t Vogelrièk, en doon weej ôs bes, um dao eine joeksigen tièd van te make. Weej haope dan auk det weej de vastelaovend tot in lingte van daag same zulle viere.
Vastelaovend Same…
Adjudant Michel
Ik bin Michel van Rens, gebaore op 16 juli 1973 in Arcen (‘t taegeswaordige Venlo noord noord noord noord), as zoon van John en Nelly.
Ik bin, al bijna 25 jaor, getrouwd met Annemiek en heb 2 kinder, Debby en Sander en woon al mièr as 24 jaor in Venlo-Zuid.
Op einen zonnigen woensdagaovend stond ôzze Chef met zien vreuke veur de deur. Ah gezellig dacht ik. Nao gezellig waat ge-aldehoord te hebbe, kwaam het hoeëge woord van ôzze chef Theo d’r oèt. Hae vroog mich, of ik same met um en Peter, deil woèl neme in ‘t dreejspan van 2022. Netuurlik heb ik heejop metein jao gezag, zonder d’r euver te hoove naodinke.
Daorbeej huuert netuurlik auk ein kort verhäölke euver michzelf.
De roots van mien femilie ligge binnen de Vogelhutbuurt. Zoè heeft mien vader gewoeënd op de alde Kap. Nausstraat en haet mienen opa geholpe met de bouw van de alde Vogelhut. As jonge knöl heb ik met mienen opa gans Venlo meuge ontdekke achter op ziene fiets en zoè heb ik same met um de Venloosche Vastelaovend lieëre kinnen. Taeves waas ik regelmaotig te vinde op de Vaegtes, waor mienen andere opa bezig waas met zien preperateursbedrièf.
Nao miene lieëgere schoeëltièd op ’t Wydtveld in Arcen, waor ik mien dialekgebrek heb ontwikkeld (urste ipv ieërste) bin ik naor MAVO “de Hamert” gegaon in Wellerlooi. Daornao bin ik de Laboratoriumschoeël gaon doon in Bliërick en heb ik 9 jaor as klinisch chemisch laborant gewerk.
Nao ein umzwerving beej KPN als hotline medewerker, kreeg ik de kans um te beginne beej miene huidige werkgever (BeckmanCoulter), waor ik werk as service engineer. Mien werk hilt in det ik de laboratoriumapparatuur installeer, onderhald en repareer. Veur dees funksie ben ik grenseuverschrijdend aan ‘t werk.
In miene vreejen tièd bin ik aktief binnen VG de Vogelhut in de technische kemmissie en bin ik twieëde chef du protocol. Daornaeve speul ik bariton beej de Fanfaar van Venlo. Auk klus ik gaer thoès en maak ik meubels van steigerholt. BBQ-en is ein hobby die ik het ganse jaor oètoeffen en dit onder t genot van een speciaal beer en einen lekkere Whisky. Auk wandele en fietse weej gaer.
De vekansies bringen weej al kamperend daor. Oeijts begôs met ein tent, daornao eine vouwwaage en noow al jaore met eine caravan. Landen als Oeësterièk, Duitsland, Italië en Tsjechië waere dan auk regelmaotig bezôg. ‘T leefs direk ein plaetske aan ‘t water, zoedet weej altièd ein moeij oètzich hebbe. Heejbeej bezeuke weej gaer de nuuedige plekke en plaetskes om ‘t gebied te lieëre kinne.
Adjudant Peter
51 jaor geleeje gebaore op eine steinworp van d’n Dörpel, opgegreujd aan den euverkant van de Majjem, einen pubertièd aan ‘t Rienke, gestudeerd in ‘t moeije Mestreech, daornao via de Postwaage, ‘t Ven en zelfs ‘t vaere Noord-Holland, oètintelik waer truuk in ‘t hertje van ôs Stedje van Lol van Plezeer. Veur mien werk riej ik elken daag naor ein magische plek in ’t rièk van den Ezelskop; veur de leefde naor Karnavals Hochburg Kölle en in mienen vreejen tièd ontdek ik gaer de res van de Wereld.
Maar waor ik auk woeënde, waorhaer auk onderwaeg, dreej daag per jaor vindse mich maar op ein plek, um ‘t moeijste fees van ‘t jaor te viere: Vastelaovend in hertje Venlo.
Flink houwe op die kis in de kinderoptoch, al zien mien 2 blaage allang volwasse, geneete van de prach en praol op de maondaag en met de kuit veuraan beej d’n onechte trouw op d’n dinsdaag. Dit jaor kump d’r dan nog ein nieje rol beej en meuge weej as dreejspan ôg dreej waeke veurgaon in deze bizondere vastelaovend.
D’n Hoeëgheid en ik? Weej zeen ôs regelmaotig in ôzzen haof. Tot in de late eurkes aldehoore, naeve einen goodgevulde bbq, aan ein goodgevulde taofel, met ein glaeske in de hand.
Vastelaovend Same.